ناهد السباعي تكشف سبب هروبها من حفل زفافها
11:46 ص الجمعة 24 مارس 2023 كتب- هاني صابر: روت الفنانة ناهد السباعي، كواليس هروبها من حفل زفافها وعدم إكتمال زواجها، مؤكدة أنها تحملت نتيجة قرارها. وقالت ناهد، في تصريحات تليفزيونية على قناة هي: لو علمتم الغيب لأخترتم الواقع، وأنا متأكدة إن اللي أنا فيه أحسن بكتير، والحياة اللي كنت هبقى فيها مش مناسبة ليا ومش شبهي، أنا كنت غلطانة ويمكن إني اتصرفت متأخر شوية وكان لازم أعمل كده بدري ومفيش حد بيتعلم ببلاش وأنا تحملت نتيجة اللي أنا عملته. ناهد السباعي، تابعت: "دايمًا بنات كتير بتفكر إننا نقدر نصلح أو نقدر حاجات كتير تتغير بعد الجواز وأن الحاجات مش هتحصل تاني بالشكل ده وأن الجواز هيغير، ولكن جه مش حقيقي ومفيش حد بيغير حد، بالعكس الناس بعد الجواز بتريح وبتبقى على طبيعتها أكتر، واللي استفدت منه أنه لازم البنت تحترم وتقدر نفسها وتعرف تبقى مع حد شبها، وتعرف تبقى في حياة هي شايفة شكلها مش حياة تبقى بتحلم بيها مع البني آدم اللي بتحبه وأنها هتحقق ده، لأ ده مش حقيقي، لازم يبقى في مقدمات لشكل الحياة". وأوضحت: "علاقتي بوالدتي قوية جدًا، وفي ناس بتقولي أن علاقتي بوالدتي أقوى من علاقة أي شخص تاني بوالدته ولكني شايفة أن لأ في ناس علاقتهم بوالدتهم زيي وأكتر كمان، وأنا متعلقة بوالدتي أوي لدرجة إني بنام جنبها في السرير وبحس بالأمان". وحول ارتباط ناهد بوالدتها هو سبب عدم زواجها، فأضافت: "مش حقيقي ومش عارفة ليه الناس بتقول كده، أنا اكتشفت أن الأب والأم اللي كويسين جدًا مع بناتهم، ده بيخليهم عندهم اكتفاء جدًا ومبيبقاش قرار الجواز سهل واختياراتهم بتبقى أصعب". يذكر أن ناهد السباعي تشارك في دراما رمضان 2023 بمسلسل الأجهر. مسلسل "الأجهر" يعرض في موسم رمضان الحالي عبر قنوات "mbc مصر" وهو بطولة عمرو سعد، درّة، سيد رجب، أحمد مجدي، عمرو عبدالجليل، محمود قابيل، سارة سلامة، أحمد صفوت، مصطفى أبو سريع، ومن تأليف ورشة ملوك، ومن إخراج ياسر سامي.
#ناهد #السباعي #تكشف #سبب #هروبها #من #حفل #زفافها